കട്ടപ്പന

ഇടുക്കി ജില്ലയിലെ ഇടുക്കി താലൂക്കില്‍ കട്ടപ്പന ബ്ലോക്ക് പഞ്ചായത്തിലാണ് കട്ടപ്പന വില്ലേജ് പരിധിയില്‍ വരുന്ന കട്ടപ്പന നഗരസഭ സ്ഥിതി ചെയ്യുന്നത്. 52.77 ചതുരശ്ര കിലോമീറ്റര്‍ വിസ്തീര്‍ണ്ണമുള്ള നഗരസഭയുടെ അതിരുകള്‍ വടക്ക് ഇരട്ടയാര്‍, പാമ്പാടുംപാറ പഞ്ചായത്തുകള്‍, കിഴക്ക് വണ്ടന്‍മേട്, പാമ്പാടുംപാറ പഞ്ചായത്തുകള്‍, തെക്ക് വണ്ടന്‍മേട് പഞ്ചായത്ത്, പടിഞ്ഞാറ് കാഞ്ചിയാര്‍ പഞ്ചായത്ത് എന്നിവയാണ്. 1953-ല്‍ തിരുകൊച്ചിയില്‍ പഞ്ചായത്ത് ഭരണം നിലവില്‍ വന്നു. ഉപ്പുതറ, ഉടുമ്പന്‍ചോല, വണ്ടന്‍മേട് പഞ്ചായത്തുകളിലും അയ്യപ്പന്‍ കോവില്‍, വണ്ടന്‍മേട്, കല്‍ക്കൂന്തല്‍ വില്ലേജുകളിലുമായി കിടന്നിരുന്ന കട്ടപ്പന കേന്ദ്രമായി ഒരു പഞ്ചായത്ത് രൂപീകരിക്കുന്നതിനുള്ള ശ്രമം ആരംഭിച്ചത് 1960-ല്‍ ആണ്. ഇതേ സമയം ഉപ്പുതറ വിഭജിച്ച് അയ്യപ്പന്‍ കോവിലും വണ്ടന്‍മേട് വിഭജിച്ച് പാമ്പാടുംപാറയും പഞ്ചായത്തുകളായി രൂപം കൊണ്ടു. 

സര്‍ക്കാരില്‍ ചെലുത്തിയ നിരന്തര സമ്മര്‍ദ്ദത്തിന്റെയും ആത്മാര്‍ത്ഥതയുടേയും ഫലമായി 18.12.1962-ലെ 191/61/ഡി.ഡി ഉത്തരവിന്‍ പ്രകാരം കട്ടപ്പന പഞ്ചായത്ത് രൂപീകരിക്കുന്നതിന് അനുമതി നല്‍കി. കട്ടപ്പന, കൂന്തളംപാറ, വള്ളക്കടവ്, വലിയകണ്ടം, വെള്ളയാംകുടി, കാമാക്ഷി, ഇരട്ടയാര്‍, പുളിയന്മല എന്നീ വാര്‍ഡുകളാണ് രൂപീകരിച്ചത്. 1963-ല്‍ നടന്ന ഈ പഞ്ചായത്തിലെ പ്രഥമ തെരെഞ്ഞടുപ്പിന്റെ ഫലമായി വി.റ്റി.സെബാസ്റ്റ്യന്റെ നേതൃത്വത്തില്‍ 1964 ജനുവരി ഒന്നിന് ആദ്യ പഞ്ചായത്ത് ഭരണസമിതി നിലവില്‍ വന്നു. കട്ടപ്പന ഗ്രാമപഞ്ചായത്ത് തികച്ചും കാര്‍ഷിക ഗ്രാമമാണ്. സമുദ്രനിരപ്പില്‍ നിന്നും ഏകദേശം 1100 മീറ്റര്‍ ഉയരത്തിലായി സഹ്യപര്‍വ്വത നിരകളില്‍ ഉള്‍പ്പെട്ട ഈ പ്രദേശത്തെ പ്രധാന ജീവനോപാധിയും കൃഷി തന്നെയാണ്. കുരുമുളക്, കാപ്പി, തെങ്ങ്, കമുക്, ഏലം, നെല്ല്, റബ്ബര്‍ തുടങ്ങിയവ മുഖ്യകൃഷിയാണെങ്കിലും കപ്പ, കൊക്കോ, ഇഞ്ചി, വാഴ തുടങ്ങിയവ ഇടവിളയായി കൃഷി ചെയ്യുന്നു. കട്ടപ്പനയുടെ വികസനത്തിനു നിര്‍ണ്ണായകമായ സ്വാധീനം ഇവിടുത്തെ ഭൂപ്രകൃതിയ്ക്കും വിഭവങ്ങള്‍ക്കുമുണ്ട്. പഞ്ചായത്തിലുള്‍പ്പെടുന്ന പ്രദേശങ്ങളുടെ മൂന്നു വശങ്ങളിലും ഉയര്‍ന്നു നില്ക്കുന്ന മലകളാണ്. വാര്‍ത്താവിനിമയ രംഗത്ത് ഏറെ പിന്നോക്കം നിന്നിരുന്ന കട്ടപ്പന ഇന്ന് സംസ്ഥാനത്തെ മറ്റേതു പട്ടണത്തോടും കിടപിടിക്കാവുന്ന സാഹചര്യത്തിലെത്തിയിട്ടുണ്ട്. ഈ പട്ടണത്തിന്റെ വളര്‍ച്ചയില്‍ നിര്‍ണ്ണായക പങ്കു വഹിച്ചത് വളരെ പ്രസിദ്ധമായ ടൂറിസ്റ്റു കേന്ദ്രമായ തേക്കടിയിലേക്കും വാണിജ്യവ്യവസായ കേന്ദ്രമായ തൊടുപുഴയിലേക്കും എത്തിപ്പെടുന്നതിനുള്ള തൊടുപുഴ പുളിയന്‍മല റോഡാണ്. ഇതോടെ കട്ടപ്പനയുടെ വളര്‍ച്ച അതിദ്രുതമാവുകയും ജില്ലയിലെ വികസ്വര നഗരങ്ങളുടെ മുന്‍പന്തിയിലെത്തുകയും ചെയ്തു. വിവിധ സാമ്പത്തിക മേഖലകളുമായി ബന്ധപ്പെടുന്നതിനും വാണിജ്യ വ്യാപര രംഗത്ത് ഒരു കുതിച്ചുചാട്ടം തന്നെ നടത്തുന്നതിനും കഴിഞ്ഞു. 2015 നവമ്പര്‍ 1 ന് കട്ടപ്പന നഗരസഭയായി ഉയര്‍ത്തപ്പെട്ടു. ഇന്ന് കട്ടപ്പന ഹൈറേഞ്ചിന്‍റെ വാണിജ്യ തലസ്ഥാനമാണ്.